生活點滴之逼爆深水埗

開頭小石頭想話先搞左HTC Cruise的相機資料先, 但係最後因為朋友的電話而改變決定先同大家分享逼爆深水埗事件的始末.

今日屋企人打電話來下令一定要係呢個星期解決寬頻續約問題, 所以小石頭就在1:30到匆匆忙忙趕去深水埗, 因為D Fans話電腦節有得平.

一去到深水埗站己經深知不妙, 因為一落車己經開始塞住左係扶手梯度!
出左閘發現D1 D2用出口已經因為實施人流管制, 只可以落唔可以上. 而最近的出口係B1. 平時慣左行長沙灣道右轉去桂林街就係高登啦, 行到桂林街先知又封左, 只可以出唔可以入!大佬啊, 整個牌或者搵個人通知下都好啊! 望住高登又唔入得, 唯有影返張相啦!


呢個就係數碼之源o窩!

都唔知應該點行, 最後都係隨波逐流跟大隊! 群眾的智慧係唔可以低估o架, 尤其係有野買的時候! 終於兜左個圈由欽州街入去, 大家可以從下面張相睇到有幾墟憾!!


搞 完寬頻, 見人逼人想睇野都埋唔到身啦! 咦! 好似高登商場入面冇出面咁多人o番, 咁樣睇下有咩咁吸引先? 哇! 差D睇出禍, 有唔使一仟個大洋的Panasonic相機: Leica鏡, 30mm廣角鏡, 1000萬像數, 有防手震功能, 重有3吋LCD Mon! 直頭係Blog友恩物啦! 重有990一部20" LCD Mon 連埋HDMI, 當堂! 不過收銀位都係逼滿人! 睇緊野途中有幾位仁兄好似有免費禮物派咁一湧而上, 搞到小石頭冇晒心機買野!

見勢不妙! D人越來越多, 小石頭為了避免成為第一個係商場被逼死的客人, 雞咁腳撒退!

出到欽州街小石頭不禁為自已英明無比的決定感到慶幸, 半條欽州街已成為行人專用區. 你睇下張相就知啦, 人頭湧湧直頭勁過美國大選!



睇下個鐘已經係3:37分啦! 最後又兜返個大圈由鴨寮街C1入口搭地鐵走人! 不過真係唔係好滿意有關當局D安排, 無指示的路標, 無足夠的警員維持秩序! 幸好當日見到我地香港人排隊守禮都幾有耐性!

我就走啦! 為之後到的朋友祈禱, 希望佢地可以買到心頭好啦!

美食分享之石澳馬拉松燒烤大賽(下集): 篇外篇: 南區堆沙大賽

話說當正在馬拉松大賽中途稍事休息的小石頭, 突然間聽到有人大聲叫咪: Testing! Testing! 身為八掛派的小石頭當然出去八下發生咩事啦, 順便行兩步幫助消化, 以期可以砌低其他熱門對手, 暴冷一舉奪冠.

咦? 原來係南區堆沙大賽! 篇外篇立即開始! 先影返下個台先! 有電子琴, 鼓, 同埋結他手(就係相中右手邊個位啦), 應該會有歌聽o番!

話時話雖然天氣報告話會幾涼下, 但係烈日當空, 真係會汗溜浹背o番! 鏡頭一轉來到堆沙現場:

由於相片太散亂的關係 (其實係懶!), 小石頭好難將我主力拍攝個幾組堆砂的大約過程重組俾大家睇, 所以以下係大兜亂. 大家可以來一個冇獎競猜大行動, 估下邊隊做邊樣啦:

場地及工具篇

公開組應該有十二隊(估o架!) 工具有紅A膠桶一個同埋幾款唔同Size沙鏟.

起動篇

開波時隊員吱吱唚唚規劃緊 開始努力堆沙

母女同心其利斷金 巾幗不讓鬚眉

中場篇

成塊金磚咁o番! 小弟弟被怪獸嚇到啊!

唔好掛住傾解先得o架! 太空人?

精挑細雕

完結篇

真係鋼琴o番! 傳說中的愛之匙!

Hong Kong Made 太空人

燈神叫大家許願啊!

金融大白鯊出動!

最鍾意大笨象和人手二合為一個張, 清晰地表達了人和動物和諧共處的意念!

細心的朋友會問: 喂點解最尾尾個兩張的色咁核突? 因為相機無電用HTC影o架! 部機神神化化, 時得時唔得咁囉! 由於每篇文最多只能加20張相, 所以未能盡錄, 有興趣的朋友, 請參觀我的相薄.

好啦, 今次南區堆沙大賽報道完畢! 下篇報道將會為HTC Curise的相機功能平反!

美食分享之石澳馬拉松燒烤大賽! 外加南區堆沙大賽花絮!(上集)

呢期小石頭非常之忙! 忙住播種! 開始慢慢Update 返D美食先.

美食分享之石澳馬拉松燒烤大賽! 外加南區堆沙大賽花絮!(上集)

(嘿嘿笈少您都搞上下集搞得多啦, 等我又學返兩招徬下身先!)

閒話休提, 話說今次係張家私房菜掌門人招集的一年一度馬拉松燒烤大賽, 參賽選手有: 大食家: 浪人, 閹尖食家: 史路比, 跑鞋專家: 阿健, XO醬專家, 神龍見首不見尾的富貴食家: 聖誕玲, 同埋初級食家: 小石頭伉儷.

點解叫馬拉松燒烤大賽? 最長記錄係由早上10:00開波直到19:30, 成九個半鐘o番, 呢D唔叫馬拉松叫咩? 今次馬拉松大賽多得掌門人和專家, 晨早起身準備D美食俾我地:

肉類:

1. 香茅豬扒同埋香茅雞翼: 清香的香茅醃埋好似係度食緊越南風味!

好彩開頭影定, 連骨都冇得剩!

燒雞呀翼我自細鍾意食!

2. 羊扒及牛扒: 弊家伙! 濃厚的羊扒同埋牛扒掛住食唔記得影.

3. 三種腸: 加長版煙法蘭克福腸, 超級好味芝士腸, 重有就係蟹子雞肉腸.

據掌門人介紹,係Sogo買, 唔係成日有得買o架!

所謂加長版真係加長版, 長過叉身三份一! 呢個就係小石頭第一個燒的東西, 似唔似勝利手勢!

蟹子雞肉腸, 轉眼間已經冇啦, 連相都食埋!

估唔到三種腸當中最受歡迎的係: 芝士腸! D芝士溶左係D肉度, 嘩已家想起都流晒口水!

海鮮類:

1. 大蝦碌及多春魚

燒完都長過燒烤叉的蝦碌, 你話大唔大啦? D蝦膏多到成隻蝦都染紅! 不過唔係紅籌股!

2. 重有笑口魚蛋, 間野D丸賣晒, 得返魚蛋!

燒燒下變笑口, 你都知可以入我地呢班食家的口係你的福氣呢!


蔬果及零食

3. 栗米以及日本蕃薯

香甜的栗米!

糖心蕃薯!

4. 面包加棉花糖

十分識食的掌門人特登整左兩塊面包頭

無錯! 呢粒燒得剛剛好的就係棉花糖啦!

5. 鹽水花生

口痕, 吹水時必備!

話得係食家, 點會咁簡單, 下面就係超級另類美食:

1. 小石頭最鍾意的美食之一豆豉大眼雞, 淡淡的豆鼓和大眼雞夾到唔識形容, 唔好意思一人唔覺唔覺食左接近兩條! 食到一半先記得影相, 唔好意思!

2. 大隻過燒春雞的乳鴿.

由大食家浪人親自操刀, 一陣已經無影無蹤, 得返棚骨!
嘩! 報告!報告!隔離個兩條埋係蟹子雞肉腸囉!

3. 新鮮好味車厘茄, 可以補充下d維他命.

4. 勁大塊鮮美無比的鱔段肥厚到出汁

掌門人密方醃制, 食到停唔到口!

5. 黃芽白加埋新鮮的蜆煮出來清甜到你唔信!

由於d野食太多加上戰情混亂, 重有參賽者不停偷走去參觀堆沙比賽, 所以比賽無辦法繼續. 今次結果當賽和, 下次再繼續!

真係好飽, 飽到第二日小石頭到晚上都食唔到野!

PS: 由於每篇文章只能放20張相, 所以篇外篇: 南區堆沙大賽下篇繼續, 請密切留意推出日期!