美食分享之合一咖啡

上星期日同石太撐臺腳食午飯, 行行下俾我地搵到間幾幽靜和舒服的西餐廳. 嘻嘻即刻同大家分享一下!

有餐湯同面包送, 石太叫左南瓜忌簾湯, 小石頭就叫羅宋湯, 個羅宋湯就清清地唔及南瓜忌簾咁香濃! 個面包唔錯o架, 烤得幾香脆加埋牛油........!

小石頭叫左客鮮茄會牛利, 淡淡清香帶微酸味的茄汁令小石頭胃口大開. 可能因為小石頭不太喜歡太酸的食物, 尤其坊間經常茄汁做得太酸的時候, 食到D咁o岩口味的茄汁, 即刻要加分!! 有三塊成半個手掌咁大的牛利, 味道都唔錯!

石太就叫左個吞拿魚忌簾意粉, 評價係食晒碟意粉. (老實講, 石太比小石頭重閹尖得多, 所以佢可以食晒的話真係幾好食o架, 如果唔係食唔完個D就係小石頭包底啦! 所以依家個肚腩……)

最大驚喜係D咖啡, 開頭我地都冇期望到乜. 但係一落口就知道有料到: 咖啡又香又滑, 比星巴克更好飲. 小石頭最鍾意飲奶茶, 對咖啡冇乜 ”顏究”, 但都覺得杯凍啡比較滑, 同埋有D苦味來又幾甘香.

餐後檢討:

兩個人埋單102元, 環境清幽, 雖然細左D. 好慢板的純音樂加埋都幾有心裝飾的地方, 真俾舒服到暈. 環境方面個人偏好, 所以俾高分! 下次試下坐沙發先, 石太嫌矮得滯, 怕吃得唔舒服所以冇坐到沙發.

Waiter都幾客氣. 食品的質素石生伉儷都不約而同打高分, 同埋有時間會返來嘆咖啡.

環境:
服務:
好味指數：
地址：佐敦廟街, 自已係圖片入面搵啦!