平民食堂系列之苑記粉麵

自從上幾個星期豪完幾餐後, 小石頭下定決心要開始搵返D平靚正的餐廳, 因為: 話晒都金融風暴, 俾人話侈奢o窩! 要儲錢買多D現金流返來囉!

平民食堂系列正式起動, 今次目標係套餐價格低於30元的餐廳! 當然係呢個價位大家就唔好對質素期望過高啦!

平民食堂系列之苑記粉麵

記得有一段時間在佐敦到油麻地一帶苑記都有幾間分店, 如今好似只剩下白加士街的分店, 記憶尤新的係苑記D辣椒油都幾辣, 所以係辣椒油罐上面提醒客人: 小心辣油過辣! 重有5隻紅椒添! 小石頭最喜歡吃辣, 呢個辣油係吸引小石頭去食的主因素之一.

當時小石頭最喜歡食的係牛沙瓜! 牛沙瓜係乜東東呢? 小石頭抄錄網上收集的解釋俾大家參考下: 牛是吃草的反芻動物, 胃有四室, 分別是瘤胃、網胃、重瓣胃和皺胃, 皺胃又叫做真胃, 是真正用來消化食物的部份, 做成牛雜後就稱為牛沙瓜或牛傘肚. 牛沙瓜個形狀和質感都和豬肚好近似, 小石頭都好鍾意食豬肚, 所以成日都想叫牛沙瓜河食! 不過一隻牛得一副胃, 所以唔係成日有得食o架!

一聽牛沙瓜, 阿姐連眉都皺埋, 跟住叫: 師傳有冇牛沙瓜? 應該冇呵? 點知今次都幾好彩, 師傳話: 有啊! 跟住個阿姐唔知做乜, 黑起塊面寫完單丟在台面就行開去了.

沙瓜就不評論啦, 因為個人偏好嗎! 個河粉就真係麻麻地, 好鬼容易斷, 成碗粉食食下斷到要用匙羹幫手.

另外一天叫了坑腩幼面, 個面都幾彈牙, 又冇乜鹼水味, 下次都係叫面好過河粉, 雖然小石頭較為喜歡食河粉. 坑腩又真係唔錯又稔又有牛味, 有D似半肥瘦叉燒咁, 加埋肥個Part都幾滑, 如果太瘦就十分黐牙.

奶茶就幾好, 有奶味又有茶味, 配搭得天衣無縫, 我鍾意!

環境都係油麻地啦, 不過食得面來時間都唔會長, 就將就下囉! 服務方面都係中游水平, 不過不失. 食物水平則保持中上, 大部份面食係21個大洋左右, 有叫野食飲品就加六個大洋就OK啦.

環境:
服務:
好味指數：
地址：白加士街近柯士甸個頭